2017 Kunstenaars

Bobby Van Jaarsveld

Bobby is op 6 Maart 1987 gebore, en is die middelkind van drie kinders. Hy het sy professionele sangloopbaan aan die einde van sy Graad 11-skooljaar begin toe hy sy eerste platekontrak aangebied is.

Bobby se album, Wat Geld Nie Kan Koop Nie, het binne twee weke na vrystelling in Oktober 2012 platinum status met verkope bereik. Hy het ook verskeie hoofrolle in flieks en musiekblyspele vertolk en is tans te sien as mentor op The Voice South Africa.

Jay

Popmusiek gaan oor innemende en melodieuse storievertelling - ’n spasie waarin JAY tuis voel en beïndruk. Hy is al vyf sterk jare in die solo-veld en sy nuutste en 2de solo-album, #DisHoeOnsRol, het stilweg en selfversekerd kort ná uitreiking platinum status behaal vir verkope van meer as 40 000 eenhede.

Platinumstatus is waar JAY sy beste werk doen. Sedert hy in 2010 op sy eie paadjie vertrek het, eggo JAY se rekordsukses, ná Eden, in elke projek wat hy aanpak.

Lianie May

Lianie May het die land in 2008 bekoor met haar weghol treffer-album ‘Vergeet my nie’. Vandaar het die Vrystaatse boeremeisie diep in die publiek se harte ingekruip. Met vele albums, multi-toekennings en ’n film agter die blad, is Lianie May ’n huishoudelike naam.

Sy is in 2006 raakgesien. Vandaar het Lianie se harde werk en deursettingsvermoë haar van krag tot krag laat gaan en is sy vandag een van die land se top vroulike kunstenaars.

Juanita du Plessis

Juanita du Plessis (née Naudé) is ’n bekende Suid-Afrikaanse sangeres wat in Namibië gebore is. Sy het na Suid-Afrika verhuis en dis uiteindelik die treffer Ska-Rumba wat van haar ’n huishoudelike naam gemaak het. Juanita is getroud met Herman (Doepie) du Plessis.

Saam het hulle drie kinders - Ruan, Mario en Franja (die laaste twee is ’n tweeling). Haar broer, Pieter Naudé is ook ’n sanger in eie reg. Totale verkope van al haar albums beloop reeds meer as 2 miljoen eenhede.

Willem Botha

Die vermaaklikheidsbedryf het met rasse skrede gegroei die dag toe Willem Botha sy toetrede gemaak het. In 2006 soengroet hy Idols-aanhangers, en intussen het hy tienduisende van sy eie bewonderaars bygekry met drie bekroonde albums en groot film-, teater- en TV-rolle agter sy naam.

Op 28 is meeste mense tevrede met ’n vaste werk. Op dié ouderdom het Willem pas teruggekeer van Europa waar hy aan die Eurovision-sangkompetisie deelgeneem het.

Leah

Leah is gebore en getoë in Bellville in Kaapstad se noordelike voorstede. Sy het ’n B.Com (Regte) agter haar naam en opleiding aan die Waterfront Teaterskool en het grootgeword in ’n huis gevul met deuntjies van haar pa se keuse.

Ná inskrywings in ’n magdom musiekkompetisies, met TV-advertensiewerk tussen in, het Leah se groot deurbraak gekom in die vorm van modelwerk: sy is raakgesien in 2011 in Rapport se Model van die Jaar-kompetisie wat sy ook gewen het.

Lee Scott

Mens vind dit moeilik om Lee Scott se musiekstyl in woorde te beskryf. Bietjie pop, ander kan sê dis Blues en Swing asook ’n bietjie rock. Hy laat dit dus vir sy gehoor om self te besluit.

Lee Scott het ’n naam vir homself in die musiekbedryf gemaak en beloof om ’n kunstenaar te wees waarmee rekening gehou moet word! Wanneer hierdie jongman op die verhoog verskyn en begin sing, kom sy kragtige en groot stem tot volle reg.

Brendan Peyper

Brendan Peyper wys waarom hy een van Suid- Afrika se mees in-aanvraag kunstenaars is met sy blinknuwe album, Hy Loop Oop - ’n album wat pols met lekkerkry en hom deur niks sal laat stuit nie!

Brendan het landwyd opslae gemaak en aanhangers oorgewen met ’n stem wat knieë lam kan sing, energiebelaaide ritmes en ’n ryk vermenging van pop- en countryklanke met ’n sterk akoestiese ondertoon. Die nuwe album bied dit alles en meer in 15 uitsoeksnitte.

Die Broers

Die Broers - Christo, Cobus en Nic - is alombekend vir hul harmonieuse sang en polsende liedjies. Hulle maak al van jongs af saam musiek en het reeds op laerskool in kore gesing en opleiding in onder meer klavier, trompet, kitaar en kontrabas ontvang.

Die Broers het musiek as voltydse beroep gekies en toer die land vol met konserte en optredes. Hulle het 7 albums en 3 DVD’s op hul kerfstok waarvan 2 albums en 2 DVD’s goue status met verkope bereik het.

Pieter Koen

Met verskeie SAMA-nominasies en ’n Vonk/Rapport-toekenning op sy kerfstok, keer Pieter Koen terug met 13 kontemporêre redes om regop te sit, die ore te spits en goeie oorspronklike musiek waarmee ons almal kan identifiseer, te vier.

Sedert 1997 is die vermaaklikheidswêreld al sy speelveld, maar dit was sy trefferalbum, Skud Jou Biscuit, wat van Koen volksbesit gemaak het. ’n Dekade later spoor dié status, sowel as sy katalogus van 8 albums en 1 DVD, hom steeds aan.

Emo Adams

Emo Adams is ’n Suid-Afrikaanse akteur en sanger wat veral bekend is vir sy produksies met David Kramer en Taliep Petersen. Hy stel sy debuut-album in 2007 onder die titel 'Tall, Dark & Afrikaans' vry.

In 2008 vertolk hy die rol van 'Solly' in die SAUK2 se mini-reeks 'Malan en Kie'. Hy is ook die aanbieder van sy eie televisieprogram 'Jou Show' op kykNET.

Andriëtte Norman

Sedert Andriëtte Norman as ’n vars vokale vonds in 2007 aan die musiekfront begin woel het, het sy musiekliefhebbers én resensente verras en beïndruk met drie puik albums wat treffers soos Napoleon, Dink aan my en Vat my hoër bevat.

Nou bied sy haar aanhangers haar 4de album, Wat Rym Met Liefde. Die album spog met talle diepsinnige nuutskeppinge deur onder andere Rudi Claase, Johan Oberholzer, Vaughan Gardiner, Emil Struwig, Helmut Meijer en haarself.

Dobbelsteun

Dobbelsteun is gestig in Augustus 2013. Hul heel eerste optrede was by die Vredendal-gholfklubhuis. ’n Paar jaar later kon hulle feeste soos Huisgenoot Namaquafees agter hul naam voeg.

In 2016 het Dobbelsteun opgetree by onder meer feeste soos Lambertsbaai Kreeffees, Leipoldtville Kuierfees, Calvinia Vleisfees, Madeliefie Makietie, Cederbergfees, Citrusdal Fees en Malkopbaai Summer Rock Fees. In 2017 tree hulle ook op by die KKNK.

Niel Somers

Neil Somers is ’n Afrikaanse sanger wat al genomineer vir ’n Huisgenoot-Tempotoekenning vir Beste Nuweling vir 2009. Hy is ook genomineer vir Beste Manlike Solo Kunstenaar 2009 tydens Rapport se Vonk-toekenningsse Vonk-toekennings.

Neil put die inspirasie vir sy musiek uit alledaagse dinge soos mense se stories en die natuur. “Gewoonlik tref ’n idee my wanneer ek regtig moeg is, dan staan ek op en gaan skryf dit dadelik, want môre is daardie liriek of melodie dalk weg,” verklap hy.

Werner Coetser

Ná Werner Coetzer sy B.A drama-graad aan die Universiteit van Pretoria behaal het, het hy sy akteurs-debuut in die rolprent, Susanna van Biljon gemaak. Werner Coetzer is egter ook geen vreemdeling wanneer dit by die kassie kom nie.

Dié akteur is veral bekend vir sy rol in die sepie, 7de Laan as Bernard (2010 - 2016). Hy is tans ook op die kassie te sien as “Blitz” Vermeulen in die kykNET-sepie, Getroud met Rugby.

Stefan Vermaak

Stefan Vermaak is ’n Suid-Afrikaanse akteur veral bekend vir sy rol as Neil in die kykNET drama, Hartland (2011). Stefan se loopbaan as akteur het in 2007 begin toe hy 15 was.

Hy het die hoofrol in die teaterstuk, Fiela se Kind, vertolk. Van toe af is die akteur te sien in sepies soos Villa Rosa en die film, Somer Son.

V.I.T.O

Vito Heyn, jong, ambisieuse rymkletser van Namakwaland - beter bekend as V.I.T.O - is besig om vinnig opgang te maak in die musiekbedryf. Vito is versot op die Afrikaanse taal en kletsrym in sy moedertaal, Nam-Afrikaans (Namakwalandse Afrikaans). Vito voel Nama-Taal kry nie genoeg erkenning nie en dus

probeer hy om die sleng in sy musiek te laat voortleef. Hy het vanjaar bekendheid verwerf by die Klein Karoo Nasionale Kunstefees, waar hy met legendariese David Kramer aan die musiekspel Amper Famous gewerk het.

Klikkerland

Klikkerland bied top-gehalte Afrikaanse kindervermaak! Kuier saam met die Klikkerlanders en leer oor wonderlike interessante dinge! Alle programme is vrolik, kleurvol en propvol avontuur.

Die kleurvolle Klikkerlanders bly in die Klikkerhuis en ondersoek alles rondom hulle met reise, avonture en hope pret.

Lollos

Lollos se vertonings is propvol energieke liedjies en snaakse grappies en die gehoor kan verwag om saam met ou bekende Lollos-liedjies te dans sowel as om saam opgewonde te raak oor vars nuwe treffers soos Willa die Gorilla, Woep Wap, en Babbel Babbel.

Hierdie keer is Lollos en Lettie albei karaktertjies binne-in hul eie videospeletjie en hulle moet op elke vlak ’n belangrike lewensbesluit maak wat sal bepaal wie die speletjie wen op die ou end.